Arweiniad i ddechrau gyrfa yn y Celfyddydau

Rhai pethau i'w hystyried

Gwnewch y gorau o'ch sgiliau trosglwyddadwy.

Byddant yn bwysig wrth gynnal eich ymarfer.

Ymchwiliwch orielau posibl

Chwiliwch am orielau/asiantaethau/sefydliadau sy'n cydymdeimlo â'ch math chi o ymarfer. Gallech gael eich gwrthod am nad yw'r gwaith yn addas i'r oriel.

Ymunwch â rhwydweithiau

Gwnewch yn siŵr eich bod ar restrau gwahodd orielau, eich bod yn cwrdd â chymheiriaid o'r un anian ac yn ffurfio cysylltiadau ag artistiaid ac orielau sy'n dangos y gwaith sy'n eich ysbrydoli.

Dogfennwch eich gwaith

Ewch i'r arfer o ddogfennu'ch gwaith a'r broses. Dysgwch sut i'w wneud eich hun, gan arbed arian a dysgu sgiliau newydd a sicrhewch fod gennych ddelweddau sydd ar gael ar fyr rybudd.

Erbyn hyn, delweddau digidol yw'r dull dogfennu gwaith arferol, oherwydd y gellir eu hanfon yn gyflym ar-lein. Dewch i nabod eglurder eich delweddau ar gyfer eu hargraffu a maint y ffeiliau i ebyst. Yn gyffredinol, oni bai y gofynnir fel arall, jpeg yw'r ffeil ddelweddau safonol.

Dangoswch eich gwaith ar-lein

Cofrestrwch â chronfeydd data ar-lein a chyflwynwch eich gwaith i gynulleidfa eang. Mae rhai cronfeydd data'n ddi-dâl ond mae gan wefannau sy'n seiliedig ar danysgrifiadau ystod o nodweddion a chyfleoedd fel rhan o'r pecyn aelodaeth. Ystyriwch greu'ch gwefan eich hun.

Cyfleoedd

Tanysgrifiwch i "Artists' Newsletter" ac "Axis"; y manteision yw mynediad i gyfleoedd, gwybodaeth a phroffil ar draws y DU. Edrychwch ar wefannau Cyngor Celfyddydau Cymru, Celfyddydau Rhyngwladol Cymru a Safle i gael newyddion am gyfleoedd.

Daliwch ati i Wneud Cais

Gwnewch gais am o leiaf 3 pheth bob mis a gwnewch yn siŵr fod gennych CV a CD o ddelweddau (a rhai y gellir eu hanfon trwy e-bost) yn barod i fynd; mae hyn yn lleihau pwysau gwneud cais ar y munud olaf.

Ceisiadau a Chynigion

Darllenwch ffurflenni cais yn ofalus. Ysgrifennwch yn ofalus gan osgoi jargon y celfyddydau. Cofiwch nad yw pwy bynnag sy'n darllen y cynnig mor gyfarwydd â'ch gwaith ag yr ydych chi. Efallai nad yw'r hyn sy'n amlwg i chi'n amlwg i bawb.

Dysgu bob amser

Ceisiwch elwa ar gyfleoedd hyfforddiant yn enwedig hyfforddiant mewn meddalwedd cyfryngau megis "photoshop", "final cut pro" a phecynnau delweddu eraill. Gall y rhain wella dogfennu a marchnata'ch gwaith.

Cydbwyso'ch amser

Osgowch waith sydd â chyflog isel i gefnogi ymarfer stiwdio (oni bai ei fod yn debygol o arwain at bethau gwell). Os yw gwaith asiantaeth yn bosibilrwydd cofiwch y bydd yr oriau hir y gallwch eu gweithio'n effeithio ar eich amser celf, a'r ochr arall i'r geiniog yw gwaith rhan- amser gyda chyflog isel. Chwiliwch am gydbwysedd ond peidiwch â chyfaddawdu o ran eich ymarfer celf. Gall gwaith yn y cyfryngau gefnogi'ch ymarfer ac mae ysgrifennu a dysgu, er enghraifft, hefyd yn gyfleodd i rwydweithio.

Dylech wybod eich gwerth

Ymchwiliwch ffioedd artistiaid/ cyflogau/ cyfraddau cyfredol. Mae gan "AN, Artists Newsletter" gyngor ar gyfraddau cyfredol i artistiaid. Os ydych yn gwerthu gwaith, ymchwiliwch eich gwerth mewn perthynas ag artistiaid eraill sy'n gwerthu eu gwaith. Nid yw 'rhy uchel' na 'rhy isel' yn dda.

Cydweithio ag eraill

Ystyriwch rannu adnoddau a byddwch yn agored i ymarfer cydweithredol; gall agor drysau i gyfleoedd a chynulleidfaoedd i'ch gwaith.

Dod yn hunangyflogedig

Os ydych yn ennill incwm o'ch gwaith rhaid i chi gofrestru'n hunangyflogedig. Bydd eich swyddfa Cyllid a Thollau Ei Mawrhydi leol yn cynnal gweithdai rheolaidd ar fod yn hunangyflogedig. Mae'n swnio'n frawychus ond mae'n haws nag yr ydych yn ei feddwl. Cadwch olwg ar waith papur/derbynebau. Cadwch flwch ar wahân neu le cyfarwydd yn eich bag ar eu cyfer cyn eu ffeilio ar ddydd Sul unwaith y mis.